Familija tari Ana Sachipovich, rromano aktivisti, zhurnalistkinja thaj manushni koja kerdja Amalipa „Osvit“, genola desh manusha. Shov djene taro olende isi olen fakultetsko diploma, avera panda sikljoven. Akana o sikljovipa thaj podikeripa tari familija okova so bashi Ana kljucho basho suksesi thaj djaipe anglal taro sa o rromano amalipa.
„Chacipa kaj me sijum jek taro na but Rromnja kas sine bah te podikerol ola e familija thaj sebepi taro odova sine ma adjahar reso ko djivipa. Mli familija djindjaman zor te odova kerav. Odoleske me me ćhavenge, unukijenge dav podikeripa kova mande da sine tari mli familija, sar bi on djanaj angle thaj te oven olen po bare reso numa so sine mande ko djivdipa.
Em baro podikeripa ko starto sine ola taro dad thaj daj, kana lilja rome thaj uli daj, odova podikeripa sine ola taro plo rom koleja 42 bersh ko prandipa thaj tari olakiri familija. Sebepi taro odova, i Ana odova podikeripa thaj shaipa taro funkcionishipa tari familija ingari ko ple ćhave thaj adjahar azhutinol te ovol olen em shukar sikljovipa.
„Kana mlo po terno ćhavo prandindjape, oleskiri rromni sine ko dujto bersh taro fakulteti. Sa e familija kerdja sa te oj ovol paralelno rromni, daj bashi tikno ćhavo, te ko rndo djal ko fakulteti, te na mukhol nijek predavanje, te sikljovol… Odothe sine olakiri daj, odothe sijuma me… Menjinamajpe thaj podikeraja, soske djana kobor importantno basho amare ćhave thaj amaro unuko: te on taha dive oven shukar manusha ko Nishi kola ka keren buti ko poshukaripa taro amlipa thaj rromano amalipa“.
E Anako fokus em but premalo ćhaja thaj djuvlja kolenca kerela buti ko arakhipa tari rromani kultura thaj tradicija. Oj, kerol buti ko SOS telefoni bashi djuvlja-viktime taro nasilje, a kerela buti ko zoralipa taro Rromnja ko pherdipa taro olengo hakaj thaj promocija kobor importantno o sikljovipa. Oj phenol kaj ki teritorija taro Foro Nish, taro sa o gendo taro rromane sikavne kola ko sistemi taro sikljovipa , 51% ćhaja.
„Odola rromane ćhaja isi olen po shukar suksesi ko sikavne taro ćhave. Ako da isi baro gendo taro ćhaja kola perena taro sistemi tao sikljovipa., chachipa kaj okolaćhaja kola na agorishinen fundoni sikavni thaj ramosaren masharuni, ovol olen po shukar reso numa e ćhaven. On ramosaren fakultetija, kola, agorishinen po buderi numa o mursha“, phenol e Ana
Sar baro problemi tano so naje buti basho Rroma kaste isi uch sikljovipa, kola sebepi tari egzistencija pale, kerena fizichko bucha.
„Odoja angluni situacija ani koja kera degradiripe sar manusha. Kana dindjam olen te oven zorale, amen iranaolen palal, odoleske so on na den, na iranen odole amalipaske okova so o amalipa dinj+dja olenge, prekalo afirmativno mere. Ko nesave thana isi amen generacija kola nashavde ki avdivesutni lumija. On naje tane ni em tele ko djivdipa kote sikljilo rromano malipa, numa na arakhle po than o sa amalipa. On tane sikavne Rroma thaj rromnja nashavde ko vakti thaj than“.
E Ana bashi buti thaj djivdipa em but kerola gndipaja kova lilja tari pli daj – te buti koja kerola kerol dji ko agor. Odoleske basho sa rromano amalipa, em but ternenge, phenol te sa so keren keren em shukar so shaj, dji ko agor thaj maj anglal “ keren sa so peske valjani. Soske kana khoni ko mangipa ple thaneja ko amalipa, ov shaj odova te buvljari hem ko avera“ thaj adjahar menjini i lumija ko po shukar.
Prevod: Turkijan Redžepi
***Media thaj reform centar Nish ko avutno vakti ka kerol serijali taro tekstija taro sikljovipe e rromengo ko Nishi thaj trujal o Nishi. O tekstija ka mothoven sar e buti e rromane ćhibjaja, inkluzivno edukacijaja, afirmativno akcije basho sikljovipe e rromengo thaj so kerol buti o civilno sektori te ovol po shukar o than taro sikljovipe e rromengo. Ka dikha te shaj te sikava kola tane o pharipa kolenca dikhena pe o Rroma ko sikljovipe – taro anglosikavnipe dji o fakulteti.
Media thaj reform centar Nish o tekstija ka sikavi ki srbikani thaj rromani ćhib, sar kotor taro projektu „Djandipe – znanje“ kova podikerol o Ministreumi tari kultura thaj informishibe tari Republika Srbija ko Konkursi basho sufinansiripe taro projektija ko javno informishibe ko ćhibja taro nacionake minoritetija ko 2017. bersh.
