Ko jugo thaj istoko tari Srbija, prema oficialno podatkija taro ramosardipa taro 2011. bersh fakulteti numa ucho sikavnipa agorisardja 274 Rroma. Numa, naje precizno podatkija kobor Rroma akana studirini ko 14 fakultetija taro nishesko Univerziteti.
26–bershengo Robert Kasumovich tano apsolventi tari farmacija ko Medicinako fakulteti ko Nishi. Uzaro odova so studirini, aktivno tano ko Amalipa taro rromane studentija ko Nishi, thaj ramosarol basho portali Mashina. Ov phenol kaj interesuipa taro terne Rroma basho sikljovipa tari medicina em baro, numa isi em ko aver fakultetija. Numa, isi baro gendo kola mukhen o studije sebepi tari ćhilali ekonomijaki buti ani koja olengiri familija.
„Stipendije kola rromane studentija lilje ko agorutne 5-6 bersh na sine kobor valjani te odola studentija shaj te bizo problemija lundjaren ple studije. Ako o studentija len nesavo azhutipa basho studije, numa o familije na len azhutipa – odothe problemi te odola studentija shaj naje olen so te uraven, naje patike numa thajra te kinen pustika. Naje kobor valjani te o rromane studentija stimilishinen te len stipendije, gndinav kaj po importantno t e sistematikane kerol pe buti e rromencar thaj odova jek taro problemija so odoborom studentija na agorishinen sikavdipa“, phenol o Robert.
Palo diplomiriba e rromenge naje buti soj panda jek sebepi te na djal pe ko siljovipa. Svako shtarto manush ko biro bashi buti taro Rrom. 14% taro terne Rroma kerol buti, ako dikhol pe 38% taro javera.
„Tumende isi jek gndipa kova disar ko rromano amalipa zoralo, te o Rroma te agorishinen da o sikljovipa nashti khuven ki buti. On tane ko hakaj ako djanol pe kaj ki Dekada e rromengi, nijekhe Rrome kova isi ole baro sikavnipa naje pi buti. Odova elementi kova naje le than ko sa akava vakeripa“, phenola Osman Balić taro YUROM centar thaj phenol kaj odova zor taro pozitivno egzampli kljucho sar te o rromano amalipa ljol ki godi kaj o siljovipa importantno thaj rola taro sikavne Rroma ki emancipacija taro sa o amalipa.
„Amen mangljam te premali Dekada maj anglal „kera“ odoja, rromani elita koja sikljovol ko univerzitetija, agorishinol fakultetija. Palo odova khuven ko amalipa thaj keren buti. Te taro odova chachipa kaj on sikavdile thaj khuvdje ki buti nesavo pozitivno signali premalo rromano amalipa thaj promovishinol pe odova racionalno gndipa te o sikljovipa ispokinolpe“, phenol Balich.
Basho Roberti djandolpe-sikljovipa valjani basho rromano amalipa. Ov pachal kaj tano pozitivno egzampli basho rromano amalipa. „Valjani te sikljoven. Odova naje angloshaipa te shaj ka djivinipe po shukar, numa shaipa tano te po shukar razuminen e lumija kote djivdina“, phenola ov.
Prevod: Turkijan Redžepi
***Media thaj reform centar Nish ko avutno vakti ka kerol serijali taro tekstija taro sikljovipe e rromengo ko Nishi thaj trujal o Nishi. O tekstija ka mothoven sar e buti e rromane ćhibjaja, inkluzivno edukacijaja, afirmativno akcije basho sikljovipe e rromengo thaj so kerol buti o civilno sektori te ovol po shukar o than taro sikljovipe e rromengo. Ka dikha te shaj te sikava kola tane o pharipa kolenca dikhena pe o Rroma ko sikljovipe – taro anglosikavnipe dji o fakulteti.
Media thaj reform centar Nish o tekstija ka sikavi ki srbikani thaj rromani ćhib, sar kotor taro projektu „Djandipe – znanje“ kova podikerol o Ministreumi tari kultura thaj informishibe tari Republika Srbija ko Konkursi basho sufinansiripe taro projektija ko javno informishibe ko ćhibja taro nacionake minoritetija ko 2017. bersh.
